Несоодветен лекарски третман е причина за смртта на 41 годишниот Ѓорги Томиќ, тврдат неговите родители. Скршени од болка раскажуваат за голготата што ја минал нивниот син во последните часови живот. Со дијагноза „акутна леукемија“ бил примен на Клиниката за хематологија и добил прва доза цитостатици по што нагло му се слошило, по неколку часа било утврдено крварење во мозокот и бил опериран на Неврохирургија по што западнал во кома од која никогаш не се разбудил.
„Во отпусното писмо пишува дека 1 часот по полноќ му се слошило на син ми, а тој имал цел ден маки…и дури го носеа како бегалец на компјутерска томографија и побараа од мене толкувач на снимката.Замислете немале ренгенолог. Мојот син седел три часа на Хематологија со излив на мозок и немало кој да го пренесе…јас со помош на доктор на раце го пренесовме на КАРИЛ“, вели Слободан Томиќ.
Родителите се надеваат дека нивната трагедија ќе биде поттик за коренити промени во здравствениот систем.Тоа што им се случило ним да не се повтори на ниту едно семејство.
„Во 21 век нема професионалци, нема доктори сите си заминаа…нема одговорност никаква не сакам моето да биде безконечност меѓутоа барам одговорност од директорката и од министерот за здравство“, вели Томиќ.
Од Клиниката за Хематологија велат дека Томиќ бил лекуван според сите современи протоколи на ова малигно заболување.Сите медицински одлуки биле донесени врз основа на состојбата на пациентот, најдобрите достапни терапии и тековните препораки во областа на хематологијата.
„Кај пациентот, веднаш е поставена дијагноза хематолошка малигна болест – акутна леукемија со изразени и серозни нарушувања во крвната слика и хемостазата. Клиниката за хематологија е отворена и стои на располагање за надлежните институции, како и за најблиските за сите информации во однос на текот на третманот на пациентот и стоиме на располагање за разговор и средба со соодветниот медицински тим. Нашата цел е да обезбедиме транспарентност и поддршка за семејствата на пациентите во секој момент“ велат од клиниката за АлфаТВ.
Акутната леукемија е брзорастечка форма на рак на крвта и коскената срцевина. Ова заболување и во светски рамки е со висока смртност, а посебно во иницијалниот третман.
