Повисок економски раст, но и повисока инфлација. Народната банка излезе со најновите есенски економски проекции. Централната банка смета дека економијата ќе порасне за 3 и пол отсто, што е зголемување за 0,5п.п. споредено со пролетната проекција. Гувернерот Славески вели дека главен двигател на растот ќе бидат бруто инвестициите кои ќе се зголемат за 10,2%, предводени од инфраструктурните проекти, општинските вложувања, странските, но и инверстициите на домашните компании. Главните ризици доаѓаат однадвор односно нестабилните трговски односи на глобално ниво поради геополитичките тензии.
Народната банка предвидува дека инфлацијата ќе се зголеми за 3,9% што е за 0,9 пп повеќе отколку предвидените 3% во април. Инфлацијата ќе биде под влијание на цените на храната, при стабилна базична инфлација и стабилизирање на цените на енергенсите. На среден рок, Народната банка очекува нејзино намалување на нивоата до 2,5% догодина и 2% во 2027-ма, исто калку што изнесува моментално во Еврозоната.
Кредитната активност забележала силен раст во првите 9 месеци и ќе изнесува 11,6% до крајот на годинава. Зголемувањето на депозитите, пак, ќе изнесува 9 и пол проценти. Гувернерот посочува дека се води претпазлива фискална политика од страна на Владата и дека таа продолжува со фискална консолидација. Се додека буџетот се реализирал согласно планираното, гувернерот Славески вели дека тој поволно влијае врз макроекономските движења.
