Битолското Основно јавно обвинителство отвори постапка против 28-годишен маж кој викендов физички нападнал лекар и двајца полицајци додека му била укажувана помош во казино, а потоа и во Клиничката болница во градот.
Осомничениот, како што соопштија од Јавното обвинителство, се гони за напад врз здравствен работник и здравствен соработник при вршење на здравствена дејност, како и за кривичното дело напад врз службено лице при вршење работи на безбедноста.
Според Обвинителството, инцидентот се случил во неделата на 29 јуни во казино во Битола, каде што осомничениот најпрвин нападнал доктор на Итната медицинска помош кој му укажувал лекарска помош. Тој го удрил докторот со тупаница, нанесувајќи му телесна повреда.
Во соопштението не е наведено од кои причини на 28-годишникот му била потребна лекарска помош, но по укажаната медицинска интервенција во казиното, тој бил пренесен во Клиничката болница во градот каде што продолжил да дава отпор и одбивал да биде третиран, поради што била повикана полициска асистенција.
„Кога пристигнале двајцата полициски службеници, осомничениот 28-годишник и нив ги нападнал, ги удирал повеќепати и им се заканувал“, се наведува во соопштението од Обвинителството.
