На декларација едно, во составот друго. Наместо со 20 проценти млечни масти, ситно сирење во маркетите се продавало со само 1 % млечни масти и 19 % палмино масло. Поради ваквите измами, кои ги открија инспекторите за храна, трговецот измамник може да одговара кривично и да си го затвори бизнисот. Директорт на Агенцијата за храна и ветеринарство Оливер Миланов информира дека во наредниот период Обвинителството ќе проверува дали производителот ги измамил граѓаните да купуваат сирење и други млечни производи со палмино масло. Од операторот на храна одземени се 22 килограми ситно сирење и изречена му е парична казна од 3 500 евра. Засега надлежните не можат да откријат дали станува збор за увозник или производител, но санкции сигурно ќе има.
Освен кај ситното сирење, палмино масло е најдено и кај друг млечен производ. Изречена му е казна од 1300 евра и повлечени од промет се 500 килограми храна која е уништена на депонија.
Инспекторите зеле и анализирале 45 мостри од млеко и млечни производи. Освен кај трговецот што работел ситно сирење, уште кај 9 производители и увозници на храна утврдено е дека во производите има помал процент на млечни масти од напишаното на декларацијата. Изречени им се казни по 1.050 евра.
Инспекторите зеле мостри и од сувомеснати производи. Се чека на резултатите коишто ќе покажат колку производите ги содржат состојките напишани на декларацијата.
Надлежните ги заоструваат мерките и казните за трговците коишто не работат согласно прописите. Освен за ваквите прекршоци, Владата најавува санкции за нефер трговски практики. Казните може да скокнат и до 200.000 евра. Законот за нефер трговски практики ќе се менува до крајот на летото, а најавената измена носи десеткратно зголемување на казните. Наместо досегашните најмногу 20.000 евра, санкциите за трговците и добавувачите што нема да го почитуваат законот би можеле да достигнат до 200.000 евра.
