Работата и работните односи се најчестите причини поради кои граѓаните пријавуваат дискриминација. Ова го покажува годишниот извештај на Комисијата за спречување и заштита од дискриминација.
За 20 проценти е намален бројот на претставки во 2024 година во однос на 2023-та. Забележано е дека има поголем број на претставки во однос на националната или етничката припадност, зад што најчесто стои политичко уверување.
Според членот на Комисијата, Игор Јадровски, проблем е што граѓаните сè уште не се охрабруваат да ја пријавуваат дискриминацијата.
Согласно извештајот, загрижувачки е тоа што речиси 80 отсто од утврдените дискриминатори се државни институции, органи на управата, општини и претпријатија кои вршат јавни овластувања.
