Три различни иницијативи во врска со системот „Сејф сити“ денеска се пред Уставниот суд. Сите иницијативи се споени во една. Уште пред официјалното воведување на системот на камери беше искажана загриженост од повеќе страни во делот на заштитата на личните податоци, како и за приватноста и слободата на движење. Системот „Сејф сити“ е во функција од 1 февруари, откако беа донесени измени на Законот за прекршоци.
Во меѓувреме, од полицијата информираат за лажни пораки наводно испратени од МВР за сообраќајни прекршоци кои стигнуваат до граѓаните. Во СВР Охрид пристигнуваат пријави од граѓани за добиени СМС пораки на нивните мобилни телефони, наводно испратени од Одделението за моторни возила при МВР со известување за „Безбеден град“ дека нивното патничко моторно возило било евидентирано за сообраќаен прекршок. Притоа, се даваат насоки на која електронска адреса можело да се видат деталите за наводниот прекршок и се повикуваат граѓаните, ако ја плателе казната во рок од осум дена, истата ќе била намалена за 50 проценти. СВР Охрид ги известува граѓаните дека станува збор за лажни пораки кои се класичен обид за измама.
„Апелираме граѓаните да бидат внимателни, добиените пораки и линкови да не ги отвораат, да не го контактираат испраќачот, да не споделуваат лични податоци и да не вршат уплата на парични средства“, велат од СВР Охрид.
