Младински културен центар – Битола денеска го одбележува Меѓународниот ден на младите, посветен на младите, нивните права, потреби, предизвици и можности, како и на нивната важна улога во создавањето на поинклузивни и одржливи општества.
Темата на Меѓународниот ден на младите за 2026 година е „Different Contexts, Common Aspirations“ („Различни контексти, заеднички аспирации“). Таа, како што велат од МКЦ-Битола, ја истакнува пораката дека, иако младите живеат во различни услови и се соочуваат со различни предизвици, нивните аспирации често се исти – да имаат можности за образование, достоинствена работа, личен развој, активно учество во заедницата и подобра иднина.
По повод денот, Младинскиот културен центар – Битола (МКЦ-Битола) организира активност посветена на младите, нивните цели и визијата за иднината.
Во соработка со „Свесност – центар за психотерапија“, денеска во 19:30 часот, на летната сцена во просториите на МКЦ-Битола на улица „Цар Самоил“ 29, ќе се одржи интерактивната работилница „Патот до целта“.
Работилницата е замислена како простор за лично истражување, размислување и размена на идеи, преку кој младите ќе имаат можност подобро да се запознаат себеси и да размислат за начинот на кој ги поставуваат и остваруваат своите цели.
Програмата ќе продолжи од 21 часот со неформално дружење и музика со DJ Chiko.
Од МКЦ-Битола порачуваат дека секој млад човек има свој пат, но сите млади имаат право на можности, поддршка и простор самостојно да ја креираат својата иднина.
