Министерот за одбрана Владо Мисајловски денеска потврди дека Македонија нема да испрати војници во Украина, нагласувајќи дека досега не е направено никакво барање за тоа од страна на Украина. Тој изјави дека како земја-членка на НАТО, Македонија е четврта по ред земја која доделува помош за Украина, но таа помош се однесува на различна опрема, а не на воена интервенција.
Мисајловски истакна дека на Македонија и е важен мирот и мирното решавање на конфликтот, бидејќи тоа ја опфаќа и колективната безбедност. Според него, најпрво има потреба од постигнување мирно решение, а потоа ќе има потреба за дополнителна помош за Украина, особено во обновата на инфраструктурата и капацитетите на земјата.
Министерот за одбрана потврди дека началникот на Генералштабот, генерал-мајор Сашко Лафчиски, учествувал на одбранбениот и безбедносен форум во Париз, на кој биле присутни воени претставници од 30 земји на ЕУ и НАТО. Таму се разговарало за нови чекори и планови за воспоставување мир во Украина, но не биле дадени конкретни решенија за идните дејствија.
Мисајловски дополнително ја изрази позицијата на Македонија, која останува насочена кон мирно решавање на конфликтот. Тој нагласи дека македонската влада ја поддржува иницијативата за мир и ја поздравува заедничката изјава на Украина и САД по нивните разговори во Џеда, кои предвидуваат прекин на огнот и продолжување на хуманитарната помош и разузнавачката размена.
