Министерот за спорт, Борко Ристовски, денеска изврши увид во изградбата на затворен базен во Кавадарци.
Објектот на поранешна ,Ла Луна” ќе прерасне во затворен базен со димензии од 25 на 9 метри и длабочина од 1.20 метри и истиот првенствено ќе се користи за децата од основните и средните општински училишта, а рекреативно ќе можат да го користат и сите останати граѓани.
Министерот Борко Ристовски беше придружуван од градоначалникот на Општина Кавадарци, Митко Јанчев и претседателот на Советот на општината.
Претходно денеска, министерот за спорт, изврши увид и на локацијата каде што е планирана изградба на нова атлетска патека во Гевгелија.
Оваа иницијатива произлегува од барањето на група спортски работници, изнесено за време на предизборните посети. Со овој проект, Гевгелија ќе добие модерна атлетска патека, која ќе биде клучна за развој на атлетските активности во градот и околината. По детална анализа, е избрана најсоодветната локација и е подготвен елаборат за изградба.
„Оваа патека ќе придонесе кон создавање подобри услови за тренинг и натпревари, поттикнувајќи го спортскиот развој на локално ниво. Проектот за изградба на атлетската патека е дел од напорите за подобрување на спортската инфраструктура и се очекува да започне наскоро. Оваа нова патека ќе биде важен ресурс за сите љубители на спортот во Гевгелија“ изјави министерот за спорт, Борко Ристовски.
Тој денеска присуствуваше и на свеченото пуштање во употреба на ново спортско мултифункционално игралиште во Давидово.
Ова игралиште ќе им овозможи на жителите на Давидово и околината да се занимаваат со различни спортови и активности, како што се кошарка, фудбал, одбојка и други.
„Изградбата на ова современо спортско игралиште е дел од нашата посветеност да го унапредиме спортскиот живот и да создадеме здрави услови за рекреација и дружење. Верувам дека оваа нова инфраструктура ќе поттикне многу млади луѓе да се занимаваат со спорт и да водат активен и здрав начин на живот. Исто така, се надевам дека ова игралиште ќе биде место каде што сите генерации ќе можат да се собираат, да играат и да се дружат“ рече Ристовски.
