Министерот за животна средина и просторно планирање, Муамет Хоџа, денеска им се придружи на волонтерите во голема акција за чистење на локалитетот Матка, едно од најзначајните природни богатства во земјава.
Како што соопшти Министерството за животна средина и просторно планирање, за време на акцијата министерот Хоџа истакна дека институциите забрзано работат на системски решенија, но дека клучот за долгорочен успех е во личната одговорност на секој поединец.
-Денеска спроведуваме акција со која го собираме отпадот, но главната цел е да испратиме порака – крајно време е одговорноста кон природата да ни стане навика. Како Министерство, инвестираме во зелена инфраструктура, но силата е во сите нас како граѓани. Чистата природа треба да ни биде стандард, а не реткост, истакна Хоџа.
Министерството упатува благодарност за соработката и поддршката до Општина Сарај, колективните постапувачи за управување со отпад и до сите волонтери „кои со својот личен пример денеска покажаа како се чува животната средина“.
-Оваа акција е дел од пошироките заложби за заштита на природните вредности и поттикнување на еколошката свест кај граѓаните, наведува МЖСПП во соопштението.
