Министерката за енергетика, рударство и минерални суровини, Сања Божиновска, ќе учествува на 9. Балкански Енергетски Самит што ќе се одржи во Атина, Грција. Настанот е организиран под покровителство на Министерството за животна средина и енергија на Грција, Министерството за енергетика на Унгарија и Регулаторната комисија за енергетика на Република Северна Македонија (РКЕ).
Божиновска ќе биде дел од министерскиот панел со кој ќе се означи официјалното отворање на самитот. Заедно со свои колеги од регионот, таа ќе дискутира за унапредување на стратешката соработка во енергетскиот сектор на Балканот. Клучни теми на панелот ќе бидат јакнењето на регионалната енергетска безбедност, развојот на хибридни енергетски решенија и креирањето на заеднички пристап кон глобалните енергетски предизвици.
Во рамки на настанот, претседателот на РКЕ, Марко Бислимоски, ќе го презентира националниот план за енергетска транзиција на Северна Македонија, со посебен фокус на постепено напуштање на јагленот и премин кон користење хидроген и природен гас, согласно долгорочните енергетски цели на земјата.
Ова издание на Балканскиот Енергетски Самит ќе собере повеќе од 40 истакнати говорници, вклучувајќи министри, регулатори и претставници од водечки компании во енергетската индустрија. Самитот претставува важна платформа за воспоставување нови стратешки партнерства и поттикнување инвестиции во енергетскиот сектор на Балканот.
