Секој ден имаме над 30 пожари, вчера беа повеќе од 50. Најголем дел од нив постојат основани сомневања дека се подметнати или се имаат случено од негрижа, истакна премиерот Христијан Мицкоски.
-До сега можам да кажам дека во месец јули ја држиме работата целосно под контрола. Во функција се сите оперативни летала кои ги има Дирекцијата за заштита и спасување, Армијата и полицијата. Во функција се специјалните возила кои ги подготвивме бидејќи знаевме што не очекува ова лето. Го активиравме и европскиот механизам, но имајте предвид дека ваков тип на огнена стихија има насекаде во Европа, зборувам во Медитеранскиот дел. Во Грција има жртви, огромни пожари, цели населби се зафатени. Во Турција исто така има жртви и повредени, цели населби и градови, Албанија, Босна, Косово, Хрватска. Србија до пред некој ден знам дека имаше 240 на ден. Шпанија, Италија, Кипар… Така што во овој момент нема слободни воздухоплови од тој ЕУ механизам кои што би помогнале, рече Мицкоски.
Премиерот посочи дека повеќе од 200 припадници на Армијата се на терен, а полицајците ги возат специјалните возила.
-Се организираме, работата е под контрола. Ќе се случува ова цело лето, ќе има и во август месец. Во овој момент немаме огнена стихија која е надвор од контрола, рече Мицкоски.
