Претседателот на Владата на Република Македонија, Христијан Мицкоски, денеска, одговарајќи на новинарското прашање поврзано со интерпелацијата на Судскиот совет и барањето за оставка на Љупчо Коцевски, истакна дека во судството не треба да има партиски луѓе.
„Последниот браник и цврст штит на поранешната влада на СДСМ и ДУИ се дел од судиите и обвинителите, меѓу кои е и лицето за кое вие сега зборувате. Најголемиот дел, би рекол 95% од обвинителите и судиите, се луѓе кои чесно си ја работат својата работа, коишто обвинуваат и судат според закон и Устав. Но, за жал, има и такви кои останаа партиски измеќари и коишто, наместо да заборават на партиските привилегии и на оние кои ги предложиле таму, се уште се верни слуги на истите, кои на времето ги предложиле да бидат таму каде што се“, одговори Мицкоски.
Премиерот Мицкоски го потенцираше и однесувањето на еден обвинител, кој, според него, наместо да биде заштитник на владеењето на правото, се одлучил да биде верен слуга на една партија која била долги години на власт и дел од коалицијата во поранешната влада.
„Посебно би го потенцирал однесувањето на еден обвинител од пред неколку дена, кој се одлучи, наместо да биде обвинител и заштитник на владеењето на правото и правдата, да биде верен слуга и измеќар на една партија која беше долги години на власт и дел од коалицијата во поранешната влада“, објасни Мицкоски.
