Нема отстапување од македонските позиции во однос на бугарското прашање – решение кое ќе биде прифатливо за двете страни, без уцени и ултиматуми. Премиерот очекува наскоро да се одржат средби со претставници на бугарската Влада на различни нивоа бидејќи мора да се градат добрососедски односи. Сепак, според Христијан Мицкоски, тоа не значи дека Македонија се согласува на некои теми кои задираат во идентитетот и ќе бидат причина за дополнителни блокади од источниот сосед.
„Што се однесува до средби, ние и веќе имавме средби во минатото со највисокото бугарско раководство со тогашниот нивен технички премиер. Очекувам во периодот што следи на различно ниво да има средби со бугарската Влада и тоа не е нешто што треба да не изненади. Нити ние ќе исчезнеме, нити тие ќе исчезнат, ние повторно ќе си бидеме соседи“, изјави Мицкоски.
Премиерот повтори дека Македонија направила толку многу отстапки, што заслужила барем да го почне процесот но е дециден дека владата нема да се согласи на никаков почеток, без јасно утврдена цел и крај на процесот без да бидеме жртви на билатерални услови.
„Затоа јас сум секогаш поборник да разговараме за теми што не зближуваат. Нашиот став е јасен и тој е непроменет и сигурен сум дека нема да биде променет, бидејќи јас лично мислам, а и претставниците во Владата мислат дека ние како народ како држава направивме премногу изминативе две и пол децении во името на европските интеграции како што никој не направил, и ценам дека конечно после 2 и пол децении или две децении откако сме кандидати дека не треба да имаме повеќе билатерални услови, туку треба да имаме објективни услови во процесот на преговори. И тоа не е нешто кое што е различно од тоа што јас сум го кажувал досега“, рече Мицкоски.
Дека има подготвеност и кај Бугарија за разговори во однос на македонските евринтеграции, потврди и министерот за европски прашања Орхан Муртезани. Тој за време на посетата на Брисел се сретна со претставникот на Бугарија во Работната група за проширување на ЕУ кој му пренел дека Софија е подготвена за разговори и упатува позитивни пораки за воспоставување на дијалог со Скопје.
Муртезани, посетата ја заокружи со средба со еврокомесарката за проширување, Марта Кос со која разговарал за реформите кои Македонија ги спроведува на патот кон ЕУ.
