Премиерот Христијан Мицкоски очекува проектот „Брза пруга“ на Коридорот 10 да почне да се реализира в година по завршувањето на физибилити-студиите и по потпишувањето договор со потенцијален финансиер.
– Продолжуваме со реализација на проектот „Брза пруга“ на Коридорот 10. Физибилити-студијата е веќе при крај и студијата за влијанието врз животната средина е исто така при крај, законско времетраење е 270 дена и очекувам летово, јуни – јули, да бидат затворени овие прашања затоа што ќе биде потребна и ревизија на овие студии. Откога ќе биде завршено сето тоа, ќе влеземе во процес на потпишување договор за потенцијален финансиер. Министерството за финансии веќе објави повик – имаме необврзувачка индикативна понуда од потенцијален понудувач и, се разбира, треба да ги потврдат условите што ги дадоа тогаш и ако биде сè како што треба, очекувам на почетокот на следната година да почне реализацијата – изјави Мицкоски на новинарско прашање по присуството на панихидата во црквата „Св. Спас“ во Скопје по повод 123 години од смртта на Гоце Делчев.
Мицкоски истакна дека продолжуваат и активностите за изградба и модернизација на Коридорот 8, каде што во железничкиот дел очекува заокружување на предвидените проекти за пругата до Бугарија и за модернизацијата на пругата од Скопје до Кичево до 2029-2030 година.
Посочи дека на источното крило на Коридорот 8 од пругата кон Бугарија се очекува тендер за избор на изведувач за третата делница и потсети дека веќе е пробиен последниот тунел од втората делница и оти првата делница е веќе во функција. Преговараме со ЕК и веќе се обезбедени пари во рамките на планот за раст за модернизација на пругата од Скопје до Кичево. Овој проект се реализира со несмалена динамика и очекувам комплетно од Кичево до границата со Бугарија да биде заокружен најдоцна до 2029/2030 година – изјави Мицкоски.
Видеото може да го погледнете на следниот линк:
