Соединетите Американски Држави ги преполовија царините за Македонија. Напорите на Владата дадоа резултат – наместо првичните 33%, тие сега ќе бидат 15%, на исто ниво како и за Европската Унија.
Премиерот е задоволен, но и оптимист дека тие ќе бидат уште пониски зашто преговорите меѓу двете земји не се завршени. Христијан Мицкоски вели дека оваа одлука ќе значи олеснување за македонската економија особено за извозно ориентираните компании.
“Од 33% тие за нас се намалени на 15%. Преговорите продолжуваат, во моментот се наоѓаме на една условно кажано пауза. Веднаш после годишните одмори кои што ќе ги користат и администрацијата во кабинетот на претседателот и канцеларијата на трговскиот претставник на САД, но и нашите луѓе во министерството и институците, очекувам во втората половина на август да продолжиме со преговорите. Очекувам да одиме уште подолу” – изјави премиерот Мицкоски.
Најновата одлука на американскиот претседател Доналд Трамп предвидува царини од 35% за Србија и 30% за Босна. Албанија и Црна Гора ќе имаат 10%, а останатите земји од регионот кои се членки на ЕУ, 15%, исто како и Македонија.
„Ние како Македонија сме во иста група како Израел, Новешка, Европската Унија и тн“, рече Мицкоски.
Од европските земји најсилно е погодена Швајцарија, со царина од 39%. Во светот највисока стапка ќе има Бразил, 50%. За Канада стапката е 35%, а за Мексико и Кина се уште нема конечна одлука.
„Верувам дека повеќе од 200 земји од светот контактирале со тимот за трговија и тарифи. Секако, како што реков претходно и како што рече претседателот, ќе им дадеме приоритет на нашите клучни трговски партнери.. Трговскиот тим работи деноноќно“, Каролин Ливит, портпарол на Белата куќа.
Македонија нема голема трговска размена со Соединетите Држави, лани 1.4% од вкупниот извоз завршил на американскиот пазар, во најголем дел тоа се автобуси и автомобилски делови произведени во слободните економски зони. Сепак, трендот е позитивен, во изминатите десет години извозот во САД е тројно зголемен. Поважно за македонските компании е тоа што сега царинската стапка за Македонија и за ЕУ е иста, зашто голем дел од македонското производство во Америка стигнува преку некоја од европските земји како дел од поголемиот синџир на снабдување. Вашингтон при утврдување на царините во најголем дел предвид ја имал трговската размена и суфицитот односно дефицитиот што тие го имаат кон другите земји.
