Енергетска транзиција, инвестиции во обновливи извори, финансирање во енергетски еколошки проекти – ова се само дел од темите на 14-тиот Глобален форум за одржлива енергија кој за првпат се одржува во Скопје. Премиерот Мицкоски вели дека енергетиката е високо на државната агенда. Таа според него не е само техничко прашање, туку национален приоритет и државна стратегија. Тој истакна дека државите мора да станат енергетски независни. Тоа што порано значело сигурен снабдувач со енергенси, сега значи флексибилен систем, отпорен пазар и чисти извори на енергија.
За министерката з аенергетика Сања Божиновска иднината е во диверзифицирани, одржливи и сигурни енергетски решенија. Таа вели дека енергијата мора да ја користиме паметно, за да се постигне стабилност во снабдувањето дури и во несигурни глобални услови. Таа потсети дека Македонија интензивно го гради интерконекторот со Грција и со Србија, инвестиција што ќе ги снабди граѓаните и бизнисите со гас, но и же обезбеди буџетски приходи од неговиот транзит.
Главниот град собра над 600 чинители во енергетиката на меѓународно ниво кои треба да дебатираат за конкретни чекори и мерки како да се елиминираат загадувачките извори на енергија, како на пример јагленот и како повеќе да се инвестира во обновливи извори. Предвидени се и повеќе билатерални средби за договорање конкретни чекори за регионална соработка.
Давид Крстевски
