Новиот бран санкции од Европската унија и САД кон Русија нема да предизвикаат енергетска криза во Македонија. Додека светот стравува од криза во енергетскиот сектор и зголемување на цената на нафтата и гасот, Владата на Македнија ги следи случувањата и работи на тоа, граѓаните да не го почувствуваат ударот од санкциите кон Русија. Премиерот Христијан Мицкоски уверува дека Македонија нема да се соочи со криза, а како пример ги посочи и неодамнешните ремонтни активности на гасоводот , кога топланите работеа.
„Не, нема да има, подготвени сме, ние ова одамна го антиципиравме и заедно работиме со дел од портфолијата во рамки на Владата за да не се случи тоа. Знаете имаше и ремонтни активности на гасоводот што ги потпишала претходната влада во заминување па не останавме без гас, односно топланите работеа. Сите овие работи ги антиципираме, но нормално е за работи кои се тековно работење на Владата. Не треба да ја оптоваруваме јавноста со такви ситници и нема да има такво нешто – изјави Мицкоски, прашан дали по последните санкции на САД и ЕУ кон Русија треба да стравуваме од нова енергетска криза.
Инаку, Европската Унија одлучи да го забрани увозот на руски гас во ЕУ од 1-ви јануари. Оваа одлука го вклучува и транзитот на таа енергија низ ЕУ до трети земји. Регулативата за ставање крај на зависноста од руската енергија со целосна забрана ќе стапи на сила од јануари 2028 година. Притоа, ќе продолжат да важат постоечките краткорочни договори склучени пред 17 јуни годинава кои ќе се спроведуваат до јуни догодина, а долгорочните договори до 1 јануари 2028 година. Сепак, Македонија нема да претрпи многу бидејќи нема голема потрошувачка. Дополнително изградбата на интерконекторот со Грција треба да придонесе Македонија да се снабдува со количини гас од друго потекло.
Истовремено Русија доби санкции и од САД. Американскиот претседател Доналд Трамп, за првпат во неговиот втор мандат, воведе санкции против Русија, насочени кон компаниите „Лукоил“ и „Росњефт“. Трамп изјави дека санкциите се насочени кон најголемите руски нафтени компании со цел Москва да биде ставена под притисок и да се согласи на разговори за мир во Украина.
