Инфлацијата изнесувала 3,5% во 2024-та година, а цените полека, но сигурно почнале да се стабилизираат. Премиерот Мицкоски вели дека намалувањето почнало уште во декември, иако не е целосно задоволен од однесувањето на трговците за време на празниците. Засега Државниот пазарен инспекторат ја следи ситуацијата, наместо да се замрзнат цените на основните прехранбени производи. Мицкоски вели дека не очекува подрастични промени, особено затоа што не поскапела струјата за да се зачува стандардот на граѓаните.
Мицкоски потенцира дека особено внимание ќе се посвети на реализација на капиталните инвестиции. Само овој месец се пушти во употреба експресниот пат Страцин – Крива Паланка, ќе се вози и по првата делница од патот Градско – Прилеп, а ќе финишира и пругата од Куманово до Бељаковце. Дополнително, еден од странските инвеститори со кои преговара Владата, го пикирал Штип како локација за своето ново вложување.
Во 2025-та, се зголемува помошта за земјоделците. Сите категории, од тутунарите до оризарите ќе бидат приоритет – вели премиерот. Директната финансиска помош се покачува на 120 милиони евра. Мицкоски, кој денеска присуствуваше на пуштање во употреба на клон од детска градинка и спортска сала во Штип, вели дека од првиот повик на Владата е планирано во оваа општина да се изгради долгоочекуваната обиколница со која ќе се поврзат двата влеза на градот. Следната година планирано е да се финансираат проекти во вредност од 6 и пол милиони евра.
