Проблеми и во ДУИ. Контроверзниот поранешен градоначалник на Струга, Рамиз Мерко, упати остри критики кон неговата матична партија ДУИ и лидерот Али Ахмети. Вели – од него се дистанцирале, применуваат двојни аршини и го игнорираат, додека други ги бранат и за нив бараат правда.
Мерко ја обвини ДУИ за двојни стандарди, посочувајќи дека не добил поддршка кога се соочил со кривични пријави, за разлика од актуелната поддршка за Блерим Беџети и Фатмир Дехари. Во објава на Фејсбук, тој наведува дека партијата селективно зборува за политички притисок и побара еднаква правда за сите.
Тој потсетува на својот долгогодишен придонес во партијата и изборните резултати, но нагласува дека останал без поддршка кога бил обвинет, тврдејќи дека станува збор за политички мотивирани случаи поврзани со административни одлуки, а не за корупција.
Мерко критикува и дека партијата различно реагира во случаи на високи функционери, како Артан Груби, и повикува на неселективна правда. И покрај критиките, изразува поддршка за Беџети, Дехари и други кои, според него, се соочуваат со политички притисоци.
Инаку, во 2023 година, САД го ставија Мерко на „црната листа“ поради вмешаност во корупција.
