Градоначалникот на Општина Чаир, Изет Меџити потенцира дека во текот на првата година од неговиот мандат се завршени или започнати низа од инфраструктурните проекти на територијата на општината ветени за време на изборната кампања.
Меџити во интервју за Алсат М истакнал дека дел од проектите од својата програма веќе се во завршна фаза, додека реализацијата на други е започната или се очекува да започне наскоро.
-Некаде сме на почетокот, а некаде сме при крај со реализацијата на проектите. Така, улицата „Ферид Мурад“ е во завршна фаза, започна реализацијата на улицата „Мит’хат Фрашери“, а започнува и проектот за улицата „Хасан Приштина“ – изјавил Меџити.
Во однос на плоштадот „Скендербег“, градоначалникот на Чаир истакнал дека процедурите се во завршна фаза и дека се очекува градежните работи да започнат пред Нова година. Според него, проектот предвидува инвестиција од над 20 милиони евра за изградба на подземен паркинг.
Меџити, како што информираат од општинсиката прес-служба, најавил дека во февруари или март е планирано да започне и реализацијата на проектот за улицата „Цветан Димов“, која ја посочил како главна сообраќајна артерија на Чаир.
Во план се и интервенции во колективните станбени објекти кои немаат лифтови.
-Исто така, наскоро ќе започнеме и со проектот за поставување лифтови во зградите кои немаат лифт – изјавил Меџити.
Градоначалникот на Чаир оценил дека во текот на првата година од мандатот се очекува реализација на програмата што ја презентираше за време на изборната кампања, а за следните три години најавил подготовка на нова програма во соработка со граѓаните.
-Сметам дека во првата година од мандатот сме во процес на реализација на целата програма што ја ветив во изборната кампања, а заедно со граѓаните ќе треба да работиме на нова програма за следните три години – заклучил Меџити.
