Македонското друштво „Илинден“ – Тирана во допис до лидерот на ВМРО-ДПМНЕ, Христијан Мицкоски, од име на Македонците во Албанија, му ја честита, како што наведува, големата победа на вчерашниот изборен ден.
-Дозволете ми во мое и во име на Македонското друштво „Илинден“-Тирана, како и на Македонците во Албанија, да ви честитаме за големата победа на ВМРО-ДПМНЕ на вчерашниот изборен ден. Татковината Македонија уште еднаш ја покажа својата зрелост со одржувањето на мирни и демократски избори, стои во честитката.
Се посочува дека македонските граѓани одбраа кој ќе ги води македонските општини во наредните четири години и оти „ВМРО-ДПМНЕ која вие успешно ја предводите има направено огромен исчекор“.
-Имате огромна поддршка од Македонците од Албанија, затоа што напредокот и благодатта на македонскиот народ претставува поттик за истрајност во напорите за негување и промоција на македонскиот национален, јазичен, културен и духовен идентитет на Македонците во соседството. Во име на Македонците од Албанија, уште еднаш го упатуваме нашето највисоко почитување до Вас, стои во честитката.
Претходно, Никола Ѓурѓај, претседател на друштвото ги повика „Македонците од Албанија со право на глас масовно да излезат и да гласаат за кандидатите за градоначалници и советнички листи на ВМРО-ДПМНЕ“.
