Македонското еколошко друштво (МЕД) ќе доделува стипендии до 400 евра месечно за матурантите од Преспа, кои ќе запишат универзитетски студии по екологија, биологија, шумарски или земјоделски науки.
Од МЕД информираат дека програмата е наменета за средношколците од Преспа и има цел да го надмине локалниот недостиг од кадар во природните науки поврзани со заштитата на природата и животната средина.
Со реализација на програмата идните студенти ќе може да стекнат знаење и вештини што ќе им овозможат активно да придонесат кон зајакнување на локалните капацитети за заштита и зачувување на природата и биолошката разновидност во Преспанскиот Регион. Покрај финансиската поддршка што ќе ја добијат избраните студенти, Македонското еколошко друштво исто така ќе ги вклучи во својата менторска програма преку која ќе стекнат практично и теренско искуство во истражувањето и заштитата на видовите и живеалиштата во Преспа.
Програма за стипендирање се реализира во рамките на проектот „Иницијатива за зелена и сина Преспа – Зајакнување на заштитата преку истражување, едукација и комуникација“, финансиран од Европската Унија (ЕУ) во рамките на програмата „ЕУ за Преспа“ и кофинансиран преку Фондот за природа „Преспа – Охрид“ (ПОНТ).
