Македонскиот јазик се учи на сите континенти, интересот расте, а со него и бројот на младите кои од најразлични краишта на светот доаѓаат во Македонија за да го усовршат јазикот, да ја запознаат културата и да станат нови амбасадори на македонистиката.
„Многу ми се допаѓа културата, литературата и, да, баш е убав јазик. И сакам да го подобрам мојот македонски јазик.“; „За мене македонскиот јазик е јазик на многу занимлива, на многу интересна култура.“; „Јас се занимавам со лингвистика и поради тоа многу ми се допадна македонскиот јазик, поради единственоста на јазикот, историјата на јазикот, дури и звукот на јазикот, бидејќи јас мислам дека е многу мелодичен јазик. И да, сега го предавам јазикот на факултетот во Торонто“, велат младите македонисти.
Ова е уште еден доказ дека македонскиот јазик не е затворен во границите на Македонија. Важно е што се отвораат и нови лекторати, но и да се задржи континуитетот на веќе постојните 12 на странски универзитети.
„Таа е голема афирмација, бидејќи тие се амбасадори на нашата култура. Со тоа се претставуваме, со тоа се етаблираме во светот и навистина има многу голем број на студенти, дури повеќе запишани во странство имаме на македонистика“, вели Кристина Николовска, директор на Меѓународниот семинар за македонски јазик, литература и култура.
„За нас е тоа посебно значајно за оние кои што сакаат да го изучуваат странскиот јазик. Зголемен е интересот и во Турција, значи во лекторатот во Анкара, и во лекторатот во Истанбул, во Ријека, дури има и барања од Универзитетот на Анкара, филолошкиот факултет, за отворање на катедра по македонски јазик“, вели Билјана Ангелова, ректор на УКИМ.
Образованието и науката претставуваат темели за иднината на нашиот јазик и идентитет, истакна министерката за култура, која го отвори 59-тиот Меѓународен семинар за македонски јазик.
„Го одржуваме овој семинар и секоја година го повторуваме она што е исклучително значајно и за јазикот и за нашиот идентитет. Министерството прави напори за подобрување и за унапредување на јазикот“, рече министерката за образование, Јаневска.
Годинава на Меѓународниот семинар за македонски јазик, литература и култура има 60 македонисти од 17 земји.
