Македонската амбасада во Тирана изрази длабоко сочувство до семејството на Славица Свидерска, професорка по македонски јазик на Лекторатот по македонски јазик на Факултетот за странски јазици, при Универзитетот во Тирана.
-Денес нашата Амбасада ја обви тишина и тага. Замина нашата драга колешка, професорката и лектор по македонски јазик на Универзитетот во Тирана, Славица Свидерска – жена со благородна душа, тивка, силна и со неизмерна љубов кон луѓето, стои во објавата на амбасадата.
Славица не беше само дел од нашиот тим, туку и дел од нашите секојдневни радости, разговори и насмевки.
Кон работата се однесуваше како да е светлина, ја ширеше љубовта кон зборот додека во нејзините реченици секогаш нè потсетуваше дека убавината живее во едноставноста на искреноста.
-Ќе ја паметиме по добрината, скромноста и топлината што ја оставаше зад себе. Нејзиниот дух ќе остане со нас – во секој збор и во секоја мисла. Овој свет изгуби едена прекрасна личност, а другиот свет доби ангел. Почивај во мир, драга Славица. Благодариме за сè, се наведува во објавата.
Славица Гаџова Свидерска родена во Битола 1984 година е македонски поет, преведувач, есеист, теоретичар на книжевноста, доктор на филолошки науки.
