Од последна, Македонија стана лидер по спроведените реформи. Премиерот Мицкоски задоволен од најновата тура одобрени средства од Планот за раст за Западен Балкан според кои земјава добива најмногу пари или 65,7 милиони евра. Тој вели дека уште од стартот на мандатот на оваа Влада се фатиле сериозно за работа. Тоа резултирало со лидерска позиција во однос на реформската агенда во јануари, што според него, ќе биде потврдено и во следниот извештај на крајот на јуни. Планот е да се издејствуваат неколку стотици милиони евра финансии од Унијата.
„Имаме интензивна комуникација со г-динот Гертијан Копман, работиме сите портвоилија во рамките на владата и очекувам оваа позиција да ја потврдиме и сега после јунскиот извештај и оние 30-тина, 31 милион кои нсе дирекна буџетска поддршка на крајот на годината да се приближиме до бројката 100 дирекна буџетска поддршка“ – вели Христијан Мицкоски – претседател на Влада.
И покрај тоа што Македонија зема најголем дел од колачот од планот за раст и дури 20 милиони евра повеќе од Албанија и Црна Гора, лидерот на СДСМ Филипче критикува дека владата не сработила ништо. Тој тврди дека државава изгубила над 200 милиони евра од ЕУ, поради неспроведени реформи.
„Ако ние имаме простор да заработиме над 200 милиони евра да добиеме од Европската Унија, а сме добиле само 60, воопшто не е битно дали некоја друга земја има повеќе или помалку од нас. Вистинскиот чекор напред се вика уставни измени. Тоа треба да се случи во земјава“ – вели Венко Филипче – претседател на СДСМ.
На Филипче, но и на сите оние кои критикуваат, премиерот им порача дека ќе посведочат на успесите на Владата во поглед на реформите. Исто како што се повлекле после изјавата на известувачот Вајц, Мицкоски прогнозира дека така ќе биде и овојпат.
„Се сеќавате како ликуваа кога излезе, за нив омилените бугарски медиуми, она интервју на известувачот Вајц, па потоа никаде ги нема тие глодари да излезат и да го коментираат интервјуто на господинот Вајц, кога јасно кажа дека има реформи коишто впрочем со овој извештај и Европската комисија го потврди. Се сеќавате ни велеа ќе доаѓал бран на мигранти, еве дојде мај месец, ќе помине и мај месец, они велеа од април, па нема ни мигрант, односно мигрант како резултат на оној договор со Обединетото Кралство. Се сеќавате минатата година водеа кампања само што не сме банкротирале, а ние денеска велиме дека и покрај сите предизвици во светот и во Европа, имаме успеси во македонската економија. И според растот на бруто домашниот производ сме во првите три, во првите пет во Европа, колку тоа и да наиде на потсмев кај одредени структури коишто јас ги нарекувам талог на ова општество“ – вели Христијан Мицкоски – претседател на Влада.
Според вицепремиерот Беким Сали, тоа што Македонија обезбеди 65,7 милиони евра преку Планот за раст поради постигнатите реформи не е случајно. Тој вели дека овој успех е резултат на координирана работа на институциите, на посветеноста на администрацијата, на политичката одговорност и на решеноста реформите да не останат само на хартија, рече тој и најави дека земјава влегува во нова фаза.
„Во третиот извештаен период државата пријави 21 реализиран реформски чекор, од кои 16 се позитивно оценети, а три чекори се реализирани пред предвидениот рок“ – вели Беким Сали – Вицепремиер и министер за европски прашања.
Македонија ги доби парите поради реформите за подобрување на финансирањето на основното и средното образование, мерките за проширување на пристапот до дигитална инфраструктура и ИТ опрема во училиштата. Од предвидените 65,7 милиони евра, 30,6 милиони евра ќе бидат префрлени во државниот буџет, додека преостанатите средства се достапни за инвестициски проекти преку Инвестициската рамка за Западен Балкан.
