Над 50 проценти од апликациите, односно половина од околу триесетината инфраструктурни проекти во Куманово, поддржани од вториот владин повик за инфраструктурна поддршка на општините, веќе се воведени во работа информираше градоначалникот на Куманово, Максим Димитриевски. Тој на прес-конференција изјави дека Општина Куманово внимателно ја следи динамиката на проектите за да не се доведат компаниите кои ги извршуваат градежните активности во финансиски ваакум.
-Над 50 проценти од сите апликации, веќе се воведени во работа. Половина од нив веќе се работат, а останатиот дел ќе бидат воведени во работа од моментот кога Владата со ребаланс на државниот буџет ќе ги обезбеди дополнителните средства. Внимаваме на постапката за да не дојдеме во несакана ситуација да ги заглавиме фирмите изведувачи во финансиски вакуум-изјави Димитриевски.
Тој додаде дека е задоволен од интензитетот на реализација на проектите. Во однос на општинската развојна компонента, Димитриевски очекува целосна реализација до крајот на годинава. Тој апелираше граѓаните редовно да ги намируваат даночните и комуналните обврски, оценувајќи дека тоа е предуслов за понатамошен развој на општината.
-Ако не платите данок, не можете да очекувате инвестиции. Ако не плаќате комунални давачки и градите диво, не можете да очекувате дека утре ќе имате инфраструктурни инвестиции. Само заедно можеме да го изградиме Куманово да биде поубаво и почисто место за живеење-изјави Димитриевски.
