Градоначалникот на Крива Паланка, Сашко Митовски, е еден од пријавените во случај за кој Секторот за внатрешни работи Куманово поднесе кривични пријави против три лица осомничени за кривично дело „злоупотреба на службената положба и овластување“.
Заедно со градоначалникот, пријави добиле и вработен во општината, како и раководителката на Одделението за урбанизам, сообраќај и заштита на животната средина.
Според соопштение од полицијата, првопријавениот – вработен во општината – и покрај тоа што дозволата за градење која ја поседувал инвеститорот веќе била истечена, изготвил решение за промена на инвеститор. Тоа го направил спротивно на Законот за градење, како и надвор од рамките на неговите овластувања и службени обврски.
Второпријавената – раководителка на Одделението за урбанизам – не извршила соодветен надзор и контрола врз изготвеното решение. Иако била свесна за истечениот рок на дозволата, таа го потпишала решението, со што му овозможила на инвеститорот од Крива Паланка да продолжи со изградба на куќа со деловен простор без валидно одобрение за градба.
Третопријавениот – градоначалникот на Крива Паланка, Сашко Митовски – не презел обврзувачки надзор над предметот и, без проверка, со свој потпис го одобрил решението како да е важечко и законско.
Постапката против осомничените продолжува во надлежното обвинителство.
