Претседателот на Уставниот суд, Дарко Костадиновски, денеска остварил средба со амбасадорот на Словенија во Македонија, Грегор Прескер, и заменик-амбасадорката Ника Ротар, на која биле разменети мислења за актуелните состојби во работата на Судот и можностите за натамошно унапредување на соработката меѓу двете земји.
Како што соопшти Уставниот суд, Костадиновски го информирал словенечкиот амбасадор за актуелностите и предизвиците со кои се соочува институцијата, како и за активностите насочени кон зголемување на ефикасноста, транспарентноста и довербата на јавноста во работата на Судот.
На средбата било истакнато значењето на досегашната соработка меѓу уставните судови на Македонија и Словенија, при што соговорниците се заложиле таа да продолжи и во иднина преку организирање заеднички активности и настани за размена на искуства и добри практики.
Костадиновски и Прескер ги нагласиле и традиционално пријателските односи меѓу двете држави, оценувајќи дека тие претставуваат добра основа за понатамошно продлабочување на соработката на институционално ниво.
