Локалниот младински совет на Општина Илинден одржа конститутивна седница во Домот на култура „Илинден“, со што, како што информира Општината, се создаваат услови за продолжување и унапредување на активностите насочени кон младите и нивното активно вклучување во локалните процеси на одлучување.
Градоначалникот на Илинден, Александар Георгиевски, на членовите на Советот им посака успешна работа, плодна соработка и успешно реализирање на планираните активности и проекти во интерес на младите од општината.
-Општина Илинден континуирано ја препознава важноста на младите како значаен двигател на општествениот развој, поради што посебно внимание посветува на создавањето можности за нивно активно учество во креирањето на локалните младински политики, кои може да придонесат за поквалитетен живот во локалната заедница, истакна Георгиевски.
Како што посочува Општината, Локалниот младински совет претставува важен механизам за иницирање активности и проекти во сите општествени области, како и во создавањето услови за личен и професионален развој на младите.
-Општина Илинден останува посветена на поддршката на младите, унапредувањето на младинскиот сектор и градењето општина во која нивните идеи и потенцијали ќе добијат можност да се преточат во конкретни иницијативи и активности во интерес на целата заедница, соопшти Општина Илинден.
