До почетокот на наредната недела ќе биде комплетиран парламентарниот состав по изборот на неколку пратеници за градоначалници на локалните избори одржани на 19 октомври и 2 ноември. Собраниската Комисијата за деловнички и мандатно-имунитетни прашања на денешната седница ги констатира мандатите на новите тројца пратеници Александра Николовска, Мартин Стојановски и Мито Андонов. Стојановски доаѓа на местото на Игор Никовски, кој претходно ја известил ДИК дека не го прифаќа мандатот.
Тие доаѓаат на местото на Бети Стаменкоска-Трајкоска, Јане Мицевски и Дејан Проданоски кои беа избрани за градоначалници на Кисела Вода, Сопиште и Прилеп.
Верифицирањето на мандатите на новите тројца пратеници треба да помине на наредната прва пленарна седница на Собранието, која, како што информира спикерот Африм Гаши на неделниот брифинг со новинарите, се очекува да се одржува на 10 или 11 ноември.
-Државната изборна комисија врз основа на спроведената постапка, констатира дека пратеници во Собранието на Република Северна Македонија за остатокот од мандатот согласно член 153 став 1 и член 153-а став 1 од Изборниот законик стануваат Александра Николовска од листата на кандидати за пратеници во Собранието за Изборна единица 1, Мартин Стојановски од Изборна единица 1 и Мито Андонов од Изборна единица 4. Државната изборна комисија, согласно член 31 став 2 точка 23 од Изборниот законик издаде уверение за избрани пратеници во Собранието на Александра Николовска, Мартин Стојановски и Мито Андонов. ДИК на седницата одржана на 03.11.2025 година го усвои Извештајот и заклучи истиот да се достави до Собранието на Република Северна Македонија, истакна на денешната седница собраниската комисија потпретседателот на ДИК, Абдуш Демири.
