По години чекање Кочани, е на чекор да добие Дом за стари лица. Проектот досега постоеше само на хартија и беше дел од речиси сите изборни ветувања, а сега влегува во завршна фаза на подготовка. Домот ќе има 141легла и ќе се гради во кругот на поранешната касарна. Ќе биде современ центар за социјална и здравствена грижа на граѓаните од третата доба. Неговата изградба ќе чини 226милиони денари, средства обезбедени од унгарскиот кредит. Од Општина Кочани, велат дека по отварањето на понудите, ќе следи избор за најповолен изведувач, по што конечно ќе започне реализацијата на еден од најзначајните социјални проекти во регионот.
„На 15јануари ги отворивме понудите и имаме пет понуди .Во текот на наредната недела ќе се разгледува документацијата и ќе се воспостави негативна аукција, односно ќе се оди на намалување на цените за изведба на домот за стари лица во Кочани„ изјави градоначалникот на Кочани, Владко Грозданов.
Работите со изградбата на домовите за стари лица во државата конечно тргнаа од место. Во Кавадарци, веќе е потпишан договор за изградба, во Пробиштип, има проект, но треба да се ревидира. Во Штип, се прават напори карабината на идниот Дом за стари лица да се легализира. Поради имотно-правни пречки, објектот се води како дивоградба и изградбата е стопирана повеќе од десет години. Дека приоритет на ресорното министерство е откочувањето на процесот, уште на самиот почеток од годината посочи заменик министерот за социјала Ѓоко Велковски, при неговата посета на Карбинци. .
„Треба прво да се разрешат тие правни елементи кои не зависат од нас како министерство, во делот на финансирањето и поддршката. Со градоначалникот ќе разговараме се што е во негова моќ да може да се направи и да се одглави овој процес и да можеме понатаму како министерство и Влада, да ја поддржиме и доизградбата на овој проект„ изјави на 3 јануари, Ѓоко Велковски, министерот за социјална политика, демографија и млади.
Единствениот дом за стари лица во источниот регион е во Берово и има капацитет да прими 67 граѓани од третата доба. Со оглед на тоа што нема друг дом листата на чекање е голема.