Судот ќе го бара Гоце Трајковски – клучниот сведок за двојното убиство кој водел паралелна истрага со полицијата по исчезнувањето на малолетната Вања Ѓорчевска. Доколку не го обезбеди, оти во моментов не е достапен на органите на прогонот, ќе одлучи дали неговиот исказ даден пред обвинителот ќе го прифати како доказ во судската постапка.
На денешното рочиште сведочеа полициски службеници кои присуствувале на претресот во семејниот дом на Палевски во село Глуво. Вечерта на 3-ти декември лани околу два часа полицајците биле во куќата во која биле брат му со сопругата и мајка им.
Од телефонот на Блаже Палевски во истиот период додека траел претресот било вртено на бројот на Вања и за ова имало записник кај обвинителството. Но полицајците не биле сведоци на такво нешто во домот на Палевски. Единствениот повик, велат сведоците бил од Блаже Палевски кон неговиот адвокат.
„Со претресот земавме еден лаптоп, еден таблет и Ајфон 6. И ги предадовме за понатамошни испитувања за потребите на колегите од Крвни деликти. Претресот беше околу 20ч. и 30 минути, имаше ангажирано адвокат кој присуствуваше на цел претрес. Претресот заврши околу 22 и 30 минути“ – изјави сведокот Елвис Ибрахим.
И вториот сведок, вработен во Единицата за економски и компјутерски криминал, потврди дека телефоните не им биле одземени туку само ги имале на увид за време на претресот.
Дали од некое службено лице е извршено вртење на телефонскиот број на Вања? – Од моја страна не беше забележано такво нешто, ниту јас, ниту други лица. Освен од Блаже Палевски кој вртеше кон својот адвокат, друго вртење од моја страна не беше забележанo“ – изјави Тодорче Георгиевски.
Првообвинетиот Палевски приговараше по сведочењето на двајцата полицајци.
„Оштетеното дете на денот на претресот е пет дена убиено. Ниту брат ми, ниту мајка ми не знаеле број од оштетеното дете Вања и кога им биле одземени телефоните не може да вртат, а просечно интелигентен човек знае дека кога има претрес во дом, се врти на телефон кој може да биде најден во околината. Сето тоа се злоупотребува од ОЈО, на 26 сведоци не најде ниту време ниту можности зошто брат ми вртел на телефон кога детето е убиено веќе пет дена“ – изјави Палевски.
Судењето за убиствата на малолетната Вања Ѓорчевска и пензионерот Панче Жежовски продолжува во петок кога ќе почне изведувањето на материјалните докази.
