По отворањето на лидерскиот самит на ЕУ и Западен Балкан посветен на Планот за раст, заедничка прес конференција одржаа претседател на Владата, Христијан Мицкоски и Марта Кос, ЕУ комесар за проширување.
– За нас, овој план не е формалност. Тоа е алатка преку која ќе ја трансформираме земјата. Ќе ги модернизираме јавните услуги, унапредиме образованието. Ќе инвестираме во енергетска и дигитална инфраструктура. Ќе ја направиме татковината вистински европски дома – пред да стане формално дел од ЕУ, изјави Мицкоски.
Но исто така, сакам да бидам јасен дека нашите чекори по европскиот пат се со отворено срце и разум. Со прифаќање на европските вредности. Меѓутоа се противиме на уцените кои не се дел од тие вредности. Не прифаќаме наметнувања под маска на европскиот процес.
Премиерот истакна дека Европа е дом на правото, на правдата, на достоинството. Тоа се вредностите што ги прифаќаме – сè друго е туѓо за Европската Унија, и туѓо за нас.
– На овој самит нашата држава влегува како држава со јасна насока. Нашите реформи не се декорација. Тие се потреба. И ние нема да чекаме некој да нè турка. Ќе се движиме самите, со сопствената волја, со конкретен план и со јасна визија, рече Мицкоски.
Испорачуваме резултати, не затоа што тоа некој го бара од нас, туку затоа што тоа го заслужуваат нашите граѓани.
-Ќе продолжиме да ги следиме европските вредности не затоа што тоа ни го наложува некој, туку затоа што тоа е нашиот избор и веруваме во тоа. Нашиот пат. Нашата определба, потенцира Мицкоски.
И затоа, благодарни сме за поддршката од Европската комисија, но уште повеќе сме решени сами да си помогнеме, да ги спроведеме реформите и да ја трансформираме земјата. Со инвестирање. Со работа. Со доверба во сопствени сили и со партнерство со ЕУ.
Ви благодарам за Вашата лична поддршка и поддршката на Европската Унија, што ја дава за Западен Балкан, додаде во изјавата.
