Ќе има ли одговорност од Дрин Ахмети за пиротехниката во неговиот гепек од „ренџ роверот”? Ниту МВР, ниту Обвинителството не кажуваат каде во моментов се наоѓа младиот бизнисмен од фамилијата Ахмети.
Обвинителството потврдува дека МВР ги известило за настанот. Сега, ќе се прават вештачења, па ќе кажат каков прекршок сторил Ахмети.
- „СВР Скопје во координација со јавен обвинител поднесе соодветен поднесок до ОЈО Скопје за нивно натамошно постапување” велат од МВР.
- „За настанот е известен јавен обвинител. Во зависност од фактите кои ќе бидат утврдени со вештачења на пронајдените пиротехнички средства јавниот обвинител ќе одлучува за натамошниот тек на постапката” кратко соопштуваат од ОЈО.
Правниците кои ги контактираше Алфа се со сомнеж дека до крај ќе се расчисти случајот. Велат ќе се заврши со парична казна според Законот за прекршоци. Адвокати за Алфа се децидни дека ќе се направи се за да се казни со најблагиот прекршок.
Синоќа, 10 минути пред 20 часот, полицијата кај Дрин Ахмети најде 749 пиротехнички средства.
- „Денеска (30.12.2023) во 19.50 часот на ул.„Самуилова“ во Скопје полициски службеници запреле патничко моторно возило „ренџ ровер“ со албански регистерски таблички, управувано од Д.А. (25) од с.Зајас-Кичево и при преглед на возилото се пронајдени пиротехнички средства“, соопштија од МВР.
Ахмети три часа беше на распит во ПС „Беко” во скопски центар, по што беше спроведен со лисици на рацете.
