Јавната установа Национален парк „Пелистер“-Битола доби директна финансиска поддршка од Агенцијата за финансиска поддршка во земјоделството и руралниот развој (АФПЗРР).
Договорот за меѓусебна соработка, користење на финансиските средства и инвестиции од значање за заштитата, унапредувањето и одржливиот развој на националниот парк го потпишаа Даниела Иротова Лазарева, директорка на АФПЗ и Иванчо Тошевски, директор на ЈУНП „Пелистер“.
-Оваа поддршка доаѓа во клучен момент и е основа за отпочнување со реализација на крупни проекти кои ќе трасираат еден сосема нов правец во развојот на НП Пелистер. Финансиските средства ќе се користат за заштита и унапредување на природните вредности и биодиверзитетот, мониторинг на видови и живеалишта, превенција и заштита од шумски пожари, одржување и унапредување на зелената инфраструктура, уредување и одржување на патеки и пристапни инфраструктурни објекти и еколошка едукација и подигнување на јавната свест, потврди Тошевски, по потшишувањето на договорот со АФПЗРР.
ЈУ Национален парк „Пелистер“ Битола во наредниот период ќе изврши и санација и реконструкција на објекти предвидени со плановите и програмите на установата, како и други активности од значење за заштитата и одржливото управување со Националниот парк.
