Во скопската населба Ѓорче Петров, денеска беше претставена интерактивната сликовница „Мила и Таро“ од македонската уметница, писателка и илустраторка Александра Младенов, односно нејзиниот превод на кинески мандарински јазик.
– Идејата за сликовницата произлезе од тоа што јас долго време сум јога-тренер за деца, а и самата ја практикувам јогата против стрес. Главна тема тука се раноразвојните рефлекси коишто преку движење се интегрираат за да се развива нервниот систем кај децата. Девојчето Мила и нејзината желка Таро ги водат децата низ јога-вежби и движења што поттикнуваат смиреност, рамнотежа, концентрација и свесност за сопственото тело, изјави Младенов.
По потекло од Македонија, од Кочани, а инаку родена и живее во Виена, Младенов е и логопед, специјален едукатор и рехабилитатор и јога-инструкторка. Таа во Австрија работи со деца од над 40 националности, меѓу кои кинесчиња, кои учат да говорат германски. Така ја добила идејата, па покрај македонското и германското издание, сликовницата сега е преведена и на мандарински јазик. Присутните се согласија оти Александра Младенов ги оправда својата професија, талент и волја, создавајќи дело од особена важност за детскиот развој, на еден толку поучен, а сепак едноставен и разбирлив начин.
Преводот на книгата на мандарински јазик 《米拉和塔罗》 е дело на професорката Сузана Недевска – учителка во Училиштето за мандарински јазик „Ни хао“.
– Желбата за работа со деца си го направи своето, како и вљубеноста во сликовници. Тоа ме поврза со писателката Александра Младенов. Таа ми се јави и посака, покрај англиската, македонската, германската, да направиме и кинеска верзија. Кога се твори за деца, чувството е најубаво. Предизвик е да се напише, но и да се преведе една ваква сликовница, треба да влеземе во светот на децата, па да го упростиме кинескиот јазик, бидејќи тука се работи за високи стилски вежби коишто требаше да им се доближат на можностите на децата. Во лекторирањето што го извршив јас, имав значајна помош и поддршка од колешката од институтот, Јухенг Лиу, па така ја подготвивме заеднички сите, изјави Недевска.
Прашана, зошто баш кинески, Младенов рече дека била поттикната од тоа што им предава Германски на кинески деца и забележала специфични тешкотии кај нив.
– Забележав дека тие се соочуваат со еден облик на дислексија и многу ми е важно оваа тема да се развие на глобално ниво. Со оваа мала сликовничка сакам да допрам – на едноставен начин, до повеќе земји, и луѓето да ја увидат важноста на јогата, па и другите спортови како сигурен пат до здраво тело и здрав дух, појасни Младенов.
Истовремено, се вели, оваа сликовница претставува прекрасен придонес во негувањето на македонскиот јазик меѓу најмладите и уште еден доказ дека Македонците во дијаспората со љубов и посветеност ги пренесуваат своите вредности на помладите поколенија. Преку патешествието на главните ликови, како што беше нагласено, децата и родителите имаат можност да го откријат светот на развојот низ игра, љубопитност и нови искуства и да ја спознаат неговата важност.
Сликовницата, според авторката, раскажува за два детски лика кои на топол и разбирлив начин ни ја презентираат важноста на движењето, учењето и здравиот детски развој.
– Ова е сликовница за деца, родители и педагози – за заедничко читање, вежбање и опуштање, додаде таа.
Имаше и детска креативна цртачка работилница проткаена со неколку едноставни детски јога-вежби.
