Високи израелски функционери тврдат дека иранскиот врховен верски лидер, Али Хaмнеи, е мртов, но за тоа засега нема официјална потврда од Техеран. Според израелските медиуми, неговото тело наводно било пронајдено во урнатините на резиденција во главниот град.
Информацијата ја пренесоа неколку светски медиуми, меѓу кои „Ројтерс“ и „Фокс њуз“, повикувајќи се на израелски извори. Израелскиот „Канал 12“ објави дека на премиерот Бенјамин Нетанјаху му била презентирана фотографија од телото на Хaмнеи.
Наводно, резиденцијата на врховниот лидер во Техеран утрово била срамнета со земја, а иранските власти го пронашле телото под урнатините. Сепак, од иранска страна следува демант.
„Непријателот води ментална и психолошка војна и сите треба да бидат свесни за тоа“, изјави раководителот за односи со јавноста во кабинетот на врховниот лидер, пренесуваат иранските државни медиуми.
Иранската новинска агенција „Тасним“ објави дека седум ракети погодиле област во близина на претседателската палата и комплексот на врховниот лидер, а сателитските снимки покажуваат сериозни оштетувања на објектите.
Неколку часа подоцна, иранското Министерство за надворешни работи соопшти дека врховниот лидер и претседателот на земјата се живи и неповредени. „Сите се безбедни“, изјави портпаролот на министерството.
Во меѓувреме, израелскиот премиер Нетанјаху го повика иранскиот народ да ја искористи, како што рече, „историската можност за промени“, додавајќи дека судбината на врховниот лидер останува нејасна.
