Пред собраниската Комисија за економски прашања, труд и енергетска политика беше образложен Предлог-законот за изменување и дополнување на Законот за минимална плата поднесен од пратеници од опозицијата. Поради одржување на закажаната пленарна седница, претседателот на Комисијата, Бојан Стојаноски, по образложувањето на Предлог-законот, ја прекина седницата и најави дека таа ќе продолжи во текот на денот, за што дополнително ќе информира.
Предлогот, го образложи пратеничката Јована Тренчевска.
Тренчевска, меѓу другото, рече дека зголемувањето на минималната плата е потребно поради растот на трошоците за живот и како што рече намалувањето на животниот стандард. Таа кажа дека сегашната плата од 26.000 денари е недоволна за потребите на семејствата, и се повика на податоците на Државниот завод за статистика за стапката на сиромаштија која изнесува 21,9 проценти.
– Неопходно е да има и вонредни мерки, како што е вонредно покачување на минималната плата, а не „слепо“ придржување до одредена методологија која е добра во мирни времиња, во времиња кога нема криза-рече Тренчевска.
Таа во образложението ја спореди македонската со минималните плати во земјите во регионот, укажувајќи дека, според неа, платите таму се повисоки и рече дека повисоките плати би можеле да придонесат младите и другите работници да останат во државата.
Предлог-законот, како што образложи Тренчевска, предвидува и финансиска поддршка за работодавачите при зголемувањето на платите.
– И самите работодавачи ќе кажат дека сакаме да имаме повисока плата за нашите работници, меѓутоа ни треба поддршка од Владата, од државата. Токму затоа во овој предлог-закон е ставена финансиска поддршка, како што беше во минатото и го користеа работодавачите – рече Тренчевска.
