По повод Светскиот ден на лицата со инвалидност – 3 декември, во „Порта Македонија“ денеска ќе биде отворена изложба на слики од XIV-тата Mеѓународна инклузивна ликовна колонија на Националниот сојуз на лица со телесен инвалидитет на Македонија – Мобилност Македонија, што од 9 до 15 октомври оваа година се одржа во Охрид, соопштија од Сојузот.
Изложбата закажана за 19 часот предвидено е да ја отвори министерот за социјална политика, демографија и млади, Фатмир Лимани.
Изложените дела се изработени од академски сликари, академски сликари со телесен инвалидитет и талентирани лица со телесен инвалидитет од Македонија и земјите од регионот.
– Националниот сојуз на лица со телесен инвалидитет на Македонија – Мобилност Македонија, низ годините зад себе, создаде традиција во организирање на ликовни колонии и ликовни изложби. Целта за организирање на ликовните колонии е да се поддржи и поттикне уметничкиот израз кај талентираните членови – лица со телесен инвалидитет, да создадат правилна перцепција за ликовните и естетските вредности, развивање на способност за препознавање и соодветно вреднување на уметничките изрази и појави од секојдневниот живот. Оваа колонија е единствена од овој вид во нашата држава, која покажа дека уметничкиот потенцијал не знае за поделби и попречености и дека нејзиното организирање има претензии да покаже и докаже дека креативните потенцијали на лицата со телесен инвалидитет се многу поважни од предрасудите дека техничката изведба е најважна, се посочува во најавата за настанот.
