Брза пруга за патнички и товарни возови од Табановце до Гевгелија, модернизирана железничка станица во Скопје, поврзана со аеродромот на метрополата. Ова е проектот кој за пет години целосно треба да ја промени сликата за македонската железница. Стратешкиот договор со Обединетото Кралство отвора потенцијал кој земјава ќе ја бетонира како најдобриот, најбрзиот и најисплатливиот транзитен пат за железнички сообраќај од сите аспекти.
Железничката траса целосно ќе се реконструира, а паралелно со постојната ќе се изгради уште една со што ќе се овозможи сообраќај на патнички возови со брзина од 160, односно товарен до 120 километри на час.
Првиот човек на МЖ Инфраструктура, Ивановски најави дека есенва ќе започне целосна реконструкција на делот на железничката пруга од Драчево до Илинден како и делот од Зелениково до Скопје. Во меѓувреме ќе се реконструира и железничката станица во Скопје.
Низ европските метрополи возот и метрото се најкористените превозни средства, кај нас граѓаните скоро и да имаат заборавено дека имаме железнички сообраќај, кој до минатата година скоро и да беше замрен.
Давид Крстевски
