Истрагата за трагичната несреќа во дискотеката во Кочани, во која животот го загубија 59 лица, а околу 200 беа тешко повредени, се проширува и вклучува вкупно 26 осомничени. Седум службени лица од СВР Штип и ПСОН Кочани се осомничени за кривично дело „тешки дела против општата сигурност“ поврзано со издавањето согласности за функционирање на дискотеката.
Министерот за внатрешни работи, Панче Тошковски, истакна дека бројот на осомничени не е конечен и дека истрагата ќе продолжи да опфаќа нови лица, доколку се утврди дека нечиј постапокувачки или непостапувачки чекор придонел за извршување на кривично дело.
Тошковски информираше дека во истрагата се вклучени голем број експерти и од Обвинителството и од МВР, а разгледувањето на документацијата е во тек. Според обвинението, службени лица од СВР Штип и ПСОН Кочани се осомничени дека како соизвршители, одобриле позитивна согласност за издавање на лиценца за угостителска дејност за дискотеката „Пулс“, иако објектот не ги исполнувал законските услови.
Основниот суд во Кочани одлучи да го продолжи притворот за сите 16 лица досега осомничени во случајот, додека двајца нови осомничени добија притвор во текот на вчерашниот ден. Мерката краткотраен притвор е побарана за вкупно 18 лица.
Полицијата продолжи со претреси, вклучувајќи ги општина Кочани и Министерството за економија, каде беа одземени документи, техничка опрема, оружје и муниција. Претреси беа извршени и кај управителот и одговорното лице на дискотеката.
Во трагичниот пожар што се случи во неделата рано наутро во дискотеката „Пулс“ во Кочани, загинаа 59 лица, а над 170 беа повредени. Според последните информации од Министерството за здравство, 64 пациенти се во стабилна состојба и се лекуваат во јавни здравствени установи во земјата, 13 во приватни здравствени установи, а 101 пациент се третираат во странски медицински центри.
