Денеска истекува владината мерка за ограничување на бруто профитната маржа и највисоките цени на основните прехранбени производи, воведена пред верските празници Рамазан и Велигден. Од Министерството за економија и труд велат дека прво ќе се анализираат крајните резултати, по што ќе се донесе одлука дали мерката ќе продолжи или ќе следуваат нови чекори.
Министерот за економија и труд, Бесар Дурмиши, порача дека ќе следуваат поригорозни мерки доколку се утврдат злоупотреби или енормно зголемување на цените по завршувањето на мерката. Според него, ограничувањето на маржите до 10 отсто дало позитивни резултати, што се потврдува и од податоците на Државниот завод за статистика.
„Во март имавме инфлација од 2,7 отсто, а во делот на храна и пијалаци е забележана дефлација од 1,3 отсто споредено со февруари. И податоците за овој месец покажуваат пад на цените. Ќе бидеме на терен со Државниот пазарен инспекторат и ќе реагираме ако се утврдат злоупотреби“, изјави Дурмиши.
Тој најави дека, ако трговците не се придржуваат до законските регулативи, ќе се прошири листата на производи опфатени со ограничување на маржите, која моментално опфаќа 102 групи на прехранбени и непрехранбени артикли.
Заменик-министерот за економија и труд, Марјан Ристески, вчера изјави дека резултатите од досегашната примена на мерката се позитивни, но дека ќе се почекаат официјалните крајни податоци што ќе бидат готови наредната недела.
„Ако има потреба, мерката ќе продолжи. Ако нема, тогаш пазарната економија ќе ги диктира цените. Се надевам дека сите учесници во трговскиот синџир научија дека интересот на граѓаните и заштитата на животниот стандард мора да бидат приоритет“, рече Ристески.
Од 20 март, мерката предвидуваше ограничување на маржите за 102 производни групи и утврдување на највисоки цени за осум основни прехранбени производи. Дополнително, со измените на Законот за заштита на потрошувачите, трговците на мало се обврзани да ги објавуваат и дневно да ги ажурираат цените на своите веб-страници.
Организацијата на потрошувачи на Македонија предложи создавање алатка за споредба на цени, а од Министерството велат дека ќе се анализира ефектот од новата обврска за транспарентност во текот на следниот месец и не ја исклучуваат можноста за создавање централна веб-страница за проверка на цени.
Во тек е и подготовката на нова просечна потрошувачка кошничка. Министерот Дурмиши најави дека се финализира драфт-верзијата која ќе опфати точни информации за трошењето на производи според бројот на членови во семејството, со цени собрани од повеќе трговци.
„Работната група работи веќе два месеца. Очекуваме наредниот месец да ја финализираме кошничката, која потоа ќе биде разгледана од Владата и социјалните партнери, по што ќе биде јавно достапна“, изјави Дурмиши.
