Патот на Македониоја е мачен, не можам да давам никакви гаранции, но Ирска ќе се заложува вашиот пат кон ЕУ да биде според заслугите. Ирскиот министер за европски прашања и одобрана Томас Брн од Скопје, ни порача дека Македонија пред себе го има она што веќе е прифатено – Францускиот предлог, кој останува прв и главен услов за напредокот во евроинтеграциите.
-Патот на Македонија кон ЕУ е мачен, тука бев пред три години по Францускиот предлог и договор. Не можам да давам никакви гаранции во животот, освен тоа дека ќе работам секојдневно за да го олеснам вашето пристапување врз основа на заслуги во Европската Унија, така ќе прават и сите други членки на ЕУ, изјави Брн.
Ирска во втората половина од оваа година ќе го преземе претседателството со Европскиот совет. Министерот за европски прашања Орхан Муртезани вели дека е добро што Ирска е еден од погласните гласови на разумот во ЕУ. Вели ја ценел нивната поддршка и очекува напредок на македонските евроинтеграции во текот на нивното претседавање.
-Веруваме дека секоја земја кандидат треба да се вреднува врз основа на своите заслуги, а не да биде заложник на билатерални прашања и политички блокади. Тоа е предуслов за зачувавање на кредибилитетот на европската идеја. Ирска во тој контекст има значајна улога како членка на Унијата од 1973-та година, таа претставува пример за успешно користење на можностите што ги носи членството инвестиции, отворање на економијата и зајакнување на институциител, изјави Муртезани.
Брн порача дека неговата држава ќе биде силен поддржувач на проширувањето според мерит системот.
-Ние кажуваме дека проширувањето на ЕУ ќе биде мошне битен приоритет за нас, процесот треба да биде вистински и ќе треба да се убедат сите граѓани без разлика дали тоа се нашите, граѓаните на земјите членки на ЕУ и на земјите кои што треба да пристапуваат, треба да ги увериме во придобивките и таму треба да постигнеме сериозен напредок. Ирска од секогаш била силен поддржувач на проширувањето на ЕУ врз основа на заслуги, изјави Брн.
Инаку, Македонија во моментов на својот европски пат го има бугарскиот проблем, односно уцените и условувањата од Софија. Ставот на Владата е јасен уставни измени се можни со одложено дејство, со цел да немаме нови блокади во текот на евроинтегративниот процес.
Матеја Петровски
