Трошоците на живот за еден месец се намалиле за 0.2%, а за една година се зголемиле за 4.5%.
Најновите податоци на Државната статистика кои се однесуваат на октомври покажуваат дека инфлацијата постепено се стабилизира, а релативно високиот годишен процент се должи пред се на ланските мерки односно есенската потрошувачка кошничка кога маржите за голем дел од производите беа замрзнати.
Премиерот сепак е уверен дека до крајот на годината инфлацијата ќе остане стабилна и ќе биде меѓу 3.5 и 4.0%, а наредната година ќе се сведе до ниво од 2 до 3%.
“Мерките се случуваат и сето тоа во одредени месеци влијае позитивно. Очекувам дека во октомври да се движиме помеѓу 4 до 4,5% поради ниското ниво минатата година во октомври а тогаш се сеќавате, имавме мерки за замарзнување на маржи. Очекувам, пристојно намалување во ноември и декември.Така што просечната годишна ставка ќе биде од 3,5 до 4 отсто што претставува една од најниските во европа и регионот.Очекувам дека наредната година нивото на инфлација ќе се движи меѓу 2 и 3 % ” – вели премиерот Мицкоски.
Премиерот очекува растот на економијата да продолжи со солидно темпо и годината да заврши со 3.5%. Потенцира дека до крајот на мандатот на оваа Влада вкупниот Бруто домашен производ да надмине 20 милијради долари.
“Ќе се приближиме до целта на оваа Влада, а тоа е до крајот на мандатот да имаме домашен бруто производ од 20 милијарди долари. Таа бројка ќе ја стигнеме веќе следната година и оваа година за прв пат номиналниот домашен бруто – производ по глава на жител ќе имаме петоцифрена бројка во долари. Односно, над 10.000 долари ќе биде домашниот бруто-производ по глава на жител” – рече Мицкоски.
Според проекциите на Народната банка економскиот раст годинава ќе достигне 3,5 отсто, а следната ќе забрза на 4%. Личната потрошувачка, поради зголемениот доход на домаќинствата и приватните и јавни инвестиции, заедно со кредитната активност на банките и поволните кредити од државата, се главни двигатели на растот. Народната банка внимателно ги следи и ризиците од надворешното и домашно опкружување и доколу има потреба, ќе ги преземат сите мерки за да се задржи стабилноста на девизниот курс и на цените.
