Основното јавно обвинителство Тетово поднесе жалба на пресудата на Основниот суд во Тетово за случајот со Теодора Ристовска, која беше прегазена на пешачки премин, а со која обвинетиот Пајазити беше осуден на затворска казна од две години.
Од Обвинителството велат дека жалбата е вложена поради висината на кривичната санкција, која според обвинителот е преблага во однос на тежината на стореното кривично дело и степенот на кривична одговорност на обвинетиот.
Меѓу околностите поради кои Обвинителството бара построга казна се особено тешките последици од сообраќајната несреќа, во која Теодора Ристовска се здоби со тешки телесни повреди, од кои потоа почина.
Од ОЈО Тетово велат дека го имале во предвид мислењето на Судскиот совет, изнесено во однос на овој предмет пред тој да биде правосилно завршен.
„Меѓутоа, со оглед на тоа што Јавното обвинителство во претходната постапка за овој настан во ниту еден момент не се согласило со двегодишната затворска казна, надлежниот јавен обвинител смета дека сепак има простор за корекција на санкцијата. Освен тоа, општиот јавен интерес, предизвикан од зачестеноста на вакви кривични дела како појава, укажува на потребата од јакнење на казнената политика како превентивен механизам, па јавниот обвинител одлучи да ја искористи законската можност и да побара од Апелацискиот суд Гостивар да ја преиначи казната во повисока“, велат од Обвинителството.
