Често миење и дезинфекција на раце, внимателност кога се фрла отпад, да се избегнува физички незаштитен контакт со ѓубре, дезинфекција на обувки, домашните миленици да не дојдат во допир со отпадот и исцедок од истиот, сите што работат во комуналните прептријатија задолжително ќе се вакцинираат превентивно за заштита од тетанус и хепатит А и Б – ова се дел од препораките на епидемиолозите околу влијанието од отпадот во Скопје врз јавното здравје. Дополнително докторите предложија во училиштата, но и пред живеалиштата секој кој е во можност да постави бариери за дезинфекција. Препорачуваат општините да направат дератизација и дезинфекција.
“Имавме случај со каснување на дете од глодар, и оттаму е апелот до институциите да си ја работат работата и да спречат поставување контејнери до училишта или здравствени институции, кои треба да имаат посебни услови за работа и опстојување. Училиштата треба да постават дезинфекциски бариери пред праговите на училиштата, а децата редовно да ги мијат рацете. Директорите да постават и слики адаптирани на возраста како правилно се мијат раце”, вели д-р Мирјана Димовска.
Од ИЈЗ посочија дека ги имаат сите реагенси доколку има некакви заболувања од контакт со глодари.
Надлежните во ИЈЗ информираа дека во моментов епидемиолошката состојба е стабилна. Потенцираќи дека секоја заразна болест има инкубациски период, кој трае во некои случаи и по две недели. Засега нема зголемување на случаи со цревни инфекции ниту граѓани со посериозни заразни заболувања кои ги пренесуваат муви и глодари како резултат на преполните котејнери.
