Вработените на ЈП „Паркови и зеленило“ со нов протест, но исти барања. Независниот синдикат конечно оствари средба со директорот на претпријатието, Јетон Бучи. Сега се во исчекување денеска да биде исплатена септемвриската плата, но за тоа да се случи прво на сметката на „Паркови и зеленило“ треба да легнат пари од Град Скопје и „Водовод и канализација“. Вработените остануваат на многу пати кажаното дека доколку не го добијат она што им следува ќе продолжат да штрајкуваат секој ден на исто место и во исто време.
Од ЈП „Паркови и зеленило“ преку соопштение велат дека претпријатието зависи од налозите и одобренијата од Град Скопје и од ЈП „Водовод и канализација“, бидејќи буџетот на ЈП „Паркови и зеленило“ се формира врз основа на овие средства.
„ЈП „Паркови и зеленило“ ги исцрпело предвидените средства за спроведување на Програмата за подигање и реконструкција на јавни зелени површини за 2025 година. Дополнително, приходите од ЈП „Водовод и канализација“ не се доволни за исплата на платите на вработените за месеците септември и октомври 2025 година.
Поради тоа, претпријатието се обрати до Градот со барање за пренамена на средства од буџетот за одобрување субвенција за надминување на потешкотиите во работењето, како и до ЈП „Водовод и канализација“ за префрлање на финансиски средства кон ЈП „Паркови и зеленило“ за сервисирање на обврските по основ на плати кон вработените“ велат од ЈП „Паркови и зеленило“
Од Независниот синдикат на „Паркови и зеленило“ велат дека доколку продолжи агонијата со неисплата на плати, нема да се приклучат на чистењето од 72 часа кое го најави новиот градоначалник на главниот град, Орце Ѓорѓиевски. Дополнително ако продолжи ова темпо на неисплаќање на плати и останати придонеси, ќе почнат да одбиваат работни задачи. Првиот човек на синдикатот Ристески најави дека се подготвуваат да го решаваат проблемот со арбитража.
Давид Крстевски
