Патот до Брисел води преку Софија. Бугарските диктати и условувања се причина зошто и оваа учебна година најверојатно ќе нема книги по историја за петто и шесто одделение. Министерот за образование се правда дека не можеле да се најдат рецензенти. Во суштина на проблемот е ревидираната историја, најголем дел од историчарите одбиваат да стават потпис на ваков учебник.
Учебниците по Историја за петто и шесто одделение заглавени во институционални лавиринти. Проблем, веројатно бугарските диктати и условувања поради кои добар дел од историчарите и професорите не сакаат да стават потпис како рецензенти. Министерот за образование Јетон Шаќири се признава дека не може да најде рецензенти, но се надева дека проблемот ќе се решел наскоро. За побрзо да оди работата, министерот бара и професорите од УКИМ да се вклучат во рецензијата на учебникот по Историја.
- Значајно е тоа што учениците имаат подготвителни материјали за цела година, подготвени од Бирото за развој на образованието според наставната програма. Очекувам дека во наредниот период, најбрзо што може, професори ќе се вклучат како рецензенти и нивните забелешки да бидат земени предвид од Националната комисија за учебници. Затоа ги повикувам сите професори, како што се вклучија за сите други учебници што ги завршивме, да се вклучат и за учебникот по Историја и општество, истакна Шаќири.
Тоа што никаде ги нема учебниците по Историја за петто и шесто одделение за наставниците е голем пропуст во образованието. Според наставникот Томислав Гиевски, државата мора да покаже поголема сериозност, и еднаш за секогаш некој да понесе одговорност оти на проблемите им нема крај.
Учебник по историја за овие одделение немаше ни лани, од истите причини. Во оние кои ги има пак има еден куп грешки – пишуваше дека Македонија на Запад граничи со Бугарија, дека врвот „Монт Еверест“ е висок 29 километри, беа помешани знамињата на некои европски држави.
Борис Грујоски
