Велигденските празници годинава носат пооптимистична слика за дел од граѓаните. Празничниот период доаѓа во време кога економската состојба, според мнозинството, покажува мали знаци на подобрување. Иако високите цени и понатаму претставуваат предизвик, граѓаните велат дека порастот на платите и пензиите придонел да се почувствува барем мало олеснување.
„Добро што се покачија и платите. На некој начин, народот се чувствува барем малку порелаксирано. Дај Боже да продолжи со ваков тренд, ќе биде добро за сите во државата…Па, малку како што се качија пензиите, малку е подобро…Сигурно дека е полесно. Ние двајцата сме пензионери, па доста полесно ни е…Се подготвуваме колку ни е можноста…Катастрофални се цените, за глава да се фати човек, да пазаруваш…Не е баш опуштено, сè е скапо. Во однос на цените, сè е скапо…
Во пресрет на празниците, пазарите беа умерено фреквентни. Граѓаните пазаруваат според своите можности, со акцент на основните и традиционалните намирници. Велат дека не претеруваат, туку купуваат по малку од сè што е потребно за трпезата.
„Па, сè од по малку – зелена салата, малку месо, сувомеснато – така, да го поминеме ова…Малку цените одат, јагнешко…Среќни сме, весели сме, најубав празник…Па од сè по малку, само без јагнешко… Руска салата, печено месо, сармичка, нешто ќе направиме…Моркови, пиперчиња и кромид. Вчера месо земавме, и тоа…Па, краставици, патлиџан, месо. Месото е исто, а краставиците се многу качени…
И покрај различните буџети, граѓаните посочуваат дека празникот ќе се одбележи во семејна атмосфера, со умерена, но доволна трпеза. Иако таа нема да биде раскошна за сите, пораката е јасна. Велигден е, пред сè, празник на духовна вредност, семејство и заедништво.
Во многу домови подготовките се прават со мерење, но и со љубов. Некои ќе подготват традиционални јадења, други ќе се задоволат со основни производи, но речиси сите велат дека најважно е да се соберат блиските на иста маса.
Велигденската радост, и оваа година, ја носат моментите поминати со семејството, мирот во домот и надежта за подобри денови.
